ہر پستی وچ اک بلندی دیکھی اے
میں مفلس دی غیرتمندی دیکھی اے
ایہہ وی خورے دور کسے فرؤن دا اے
انساناں دی حالت مندی دیکھی اے
سبھ دیاں سوچاں تے میں پہرے دیکھے نے
سبھ دیاں ہوٹھاں تے پابندی دیکھی اے
بندے پچھے، رب دے نال وی جھگڑے آں
توں ساڈی انسان پسندی ویکھی اے
کجھ گندیاں توں گلاں چنگیاں سُنیاں نے
کجھ چنگیاں دی نیت گندی ویکھی اے
دسن نال نوازش پیڑ جگر دی میں
اگے نالوں ہور دو چندی دیکھی اے
تنویر نوازش
No comments:
Post a Comment
Note: only a member of this blog may post a comment.