ڈھلدی دیگر نماشاں توں پہلے زرد سورج ڈولاندا ڈِٹھا اے
مِٹھے چشمے دا ٹھڈھا پانڑی تیلک کے پتھراں توں ڈھاندا ڈٹھا اے
حسین موسم، حسین منظر، پہاڑ اُچے تے رستا تنگ اے
فلک دی نیلی وینڑی اُتے کالے بدلاں دی پتلی ونگ اے
شرابی جلوے پئے رقص کردنڑ ہر نظارے دا وکھرا رنگ اے
ہوا درختاں نوں جپھیاں پاوےعجب پیار نرالا سنگ اے
ندی کنارے اوڈیک رکھ کے میں ہک مسافر نوں باندا ڈٹھا اے
گھاٹے رخاں دی اوٹ لایے کے اوہنوں تکے پر آپ لکے
سجنڑ دے آونڑ دا ہڑکا ہا سو اکھیں مل مل کے راہواں تکے
پتر کھڑکے تاں بھج اوٹھیوے ترکھے ساہواں نوں مسیں ڈکے
چھنا چُوری دا ہتھ تے چا کے میں چن پہاڑی توں لاندا ڈٹھا اے
چودھار پُھلاں دی اوچی واڑ ہا وچکار گھا تے او دوویں باہے گئے
ہک دی جھولی دُووے دا سر ہا، نین نیناں نوں تکدے رہے گئے
ہوٹھ ہوٹھاں دے نیڑے ہو گئے وال چہرے تے کھل کے ڈھائے گئے
سال پورے دی اودر ہا نے ہجر دے سارے تھکیڑے لایے گئے
نیماشاں ڈھلیاں تے ہوش پرتے بھج کے اٹھے روسوائی دے ڈر توں
واسیب اپنڑے دا علم ہانے ٹر پئے چھودے تنہائی دے ڈر توں
گل اچ باواں ملنڑ دے واعدے قسماں چاونڑ جدائی دے ڈر توں
ہک دا قاسم گھر ہا نیڑے دووا دھکے پتھراں دے کھاندا ڈٹھا اے
مٹھے چشمے دا ٹھڈھا پانڑی تیلک کے پتھراں توں ڈھاندا ڈٹھا اے
قاسم کلوانہ
No comments:
Post a Comment
Note: only a member of this blog may post a comment.