پنجابی پوٹھواری پوٹھوہاری پہاڑی شاعری
رکشے آلا
چنگ چی چنگ چی رکشے آلا آیا اے
جان تکو نِکی جہئ، بھار کیڈا چائیا اے
چیز ایہہ کمال نی تے صفتاں نیاریاں
بہئ جانڑ سوکھیاں بارہ (12) سواریاں
آئی جاؤ آئی جاؤ ہور پئیا بٹھانڑاں اے
بسم اللہ جی کراں دسو کُتھہ جانڑاں اے
دُور نیڑے پینڈا یا ہور مجبوری اے
خُشی غمی لغی آئی، جانڑاں وی ضروری اے
کھل پیوے آنڑو بھنویں بھوہ ٹانڈا لدّو جی
بہڑے وچ پوہچساں فون کری سدّو جی
جھٹہ گھڑی پوہچناں دیری نئیں لانڑاں اے
بسم اللہ جی کراں دسو کُتھہ جانڑاں اے
ڈھوکاں تے گراں وچ ہر حال پوہچناں
گلیاں محلیاں چ نالو نال پوہچناں
آڑیاں باڑیاں تے بنّاں اپر دوڑناں
ٹوٹیاں تے ویگناں کی پِچھہ پئیا چھوڑناں
مِسہ کسوال، بھائی خان، گُلیانڑاں اے
بسم اللہ جی کراں دسو کُتھہ جانڑاں اے
مہلواں، جھماٹھی، بھلوٹ، کوئی دُور نئیں
سوئیں چیمہ، بیول، سموٹ، کوئی دُور نئیں
کُوہلاں، جبرکسی، ملالہ، وی تے نیڑے اے
چُلو چکڑالی، ایہ رتالہ، وی تے نیڑے اے
قاضیاں، منجھوٹھہ، تے بھٹیاں، بھڈانڑاں اے
بسم اللہ جی کراں دسو کُتھہ جانڑاں اے
چوک ہووے سڑک یا مین بازار اے
اگا پِچھہ ہونڑاں نئیں کھلناں بشکار اے
پُچھن آلا کوئی نئیں جتھہ چاہو لہئ جاو
کھلناں تے کھلی جاو لہنڑاں تے لہئ جاو
جائی جائی کھلناں سواریاں بٹھانڑاں اے
بسم اللہ جی کراں، دسو کُتھہ جانڑاں اے
تیز رفتار بونہہ تے مارنا اُڈاریاں
سچی جے پُچھو تے سہولتاں نے ساریاں
گرمیاں چ ٹھڈی ٹھڈی ہوا پئیا جھولناں
چلناں تے لغنڑاں جہاز پئیا بولناں
لمیاں منزلاں تے دُور ٹھکانڑاں اے
بسم اللہ جی کراں دسو کُتھہ جانڑاں اے
غریباں نا جینڑاں وی سلیم کوئی جینڑاں اے
پیسے آلا غریب نا لہو پئیا پینڑاں اے
گھٹ اِتھہ خُشیاں تے غم بے شُمار نے
سراں تے چائے ہوئے قرضیاں نے بھار نے
نکو نکیں ہوئے آں قرضہ مُکانڑاں اے
بسم اللہ جی کراں دسو کُتھہ جانڑاں اے
مرزا سلیم
No comments:
Post a Comment
Note: only a member of this blog may post a comment.