پنجابی پوٹھواری پوٹھوہاری پہاڑی شاعری
اُچے نیویں ٹِبیاں نی جندڑی ہُلاریا
توں وی پوٹھوہاری ایں تے میں وی پوٹھوہاریا
شکلاں نا پہلا بندہ اساں نی میراث ای
ہتھاں نیاں عقلاں نا ویلا بڑا خاص ای
وٹّا ہتھیاریا تے رزق شکاریا
توں وی پوٹھوہاری ایں تے میں وی پوٹھوہاریا
تہاڑی مہاڑی تینڈھی مینڈھی ہکا جئی گل اے
بولیاں تے لہجے جنج بدناں نی کھل اے
صدیاں نی چُپ اگے ہالی وی نیئں ہاریا
توں وی پوٹھوہاری ایں تے میں وی پوٹھوہاریا
باجرے نی روٹیاں تے گندلاں نا ساگ ای
تُہپ کنڑیں سونا ہنڑیں اپڑاں اے بھاگ ای
موسمی مقدراں نے چنے نیا تاریا
توں وی پوٹھوہاری ایں تے میں وی پوٹھوہاریا
دے نی دلیریاں تے ہونٹھاں نی گنڈیریاں
ادھی راتی کھوئے پر پُھلاں نیاں پھیریاں
عشق سمندرے نے وڈیا کھڈاریا
توں وی پوٹھوہاری ایں تے میں وی پوٹھوہاریا
شعیب خالق
No comments:
Post a Comment
Note: only a member of this blog may post a comment.