سلطان باہو (شخصی و علمی تعارف و حالات زندگی)

 سلطان باہو 

سلطان باہو المعروف سخی سلطان باہو بروز جمعرات یکم جمادی الثانی 1039سن ہجری بمطابق 17 جنوری 1630سن عیسوی کو (سابقہ متحدہ ہندوستان) موجودہ پاکستان کے صوبہ پنجاب کے، ضلع جھنگ کے مشہور مقام شورکوٹ میں پیدا ہوئے۔ آپ کے والد سلطان بازید محمد، مغل شہنشاہ شاہجہان کی مغل فوج کے ایک اعلیٰ کماندار ہونے کے ساتھ ساتھ شور قلعے کے قلعہ دار بھی تھے۔ آپ کے بارے میں روایت ہے کہ وہ ایک صالح، شریعت کے پابند، حافظِ قرآن فقیہ شخصیت تھے۔ آپ ابھی کم سِن تھے کہ آپ کے والدِ ماجد کا وصال ہو گیا، جس کے بعد آپ کی تعلیم و تربیت کا فریضہ آپ کی والدہ بی بی راستی نے بطریق احسن سر انجام دیا، جس کی جھلک آپ کی شاعری میں بھی ملتی ہے؛۔ 

نام باہو مادر باہو نہاد

زانکہ باہو دائمی باہو نہاد

ترجمہ:باہو کی ماں نے نام باہو رکھا کیونکہ باہو ہمیشہ ہُو کے ساتھ رہا

سخی سلطان باہو کا تعلق سلسلہ سروری قادری سے تھا، آپ اپنے عہد کے کامل بزرگ اور پنجابی زبان کے عظیم صوفی شاعر تھے. آپ کے کلام میں ایک معرفت  سے بھرپور روح پرور تاثیر پائی جاتی ہے، کلام کی مٹھاس اور چاشنی سیدھا جا کر سننے والے کی دل پر اثر کرتی ہے۔ آپ کے کلام کی سب سے خاص بات اسمِ ربی ”ہو“ کا استعمال ہے، جو سیدھا جا کر دل و دماغ کر جھنجھوڑ کر رکھ دیتا ہے۔ آپ کا کلام پڑھا اور سُنا جائے تو سامع پر ایک الوہی کیفیت طاری ہو جاتی ہے۔ اسی ہو کی کشش آپ کو تمام صوفی شعراء سے ممتاز کرتی ہے۔ ان کے عارفانہ کلام کی کشش کئی صدیاں گزرنے کے باجود آج بھی رات کی رانی کی خوشبو جیسے معطر معطر چار سو پھیلی محسوس ہوتی ہے۔ آپ کی زندگی کا ایک بڑا عرصہ ملتان، ڈیرہ غازی خان، ڈیرہ اسمٰعیل خان اور چولستان کے نواع میں تبلیغی و علمی سفر کر کے مخلوقِ خدا کو نیکی و راستی کی دعوت دیتے بسر ہوا۔ اللہ تعالیٰ نے آپ کو بہترین تبلیغی صلاحیت سے نوازا تھا، آپ کی خطابت سننے والے کے دل کو جھنجھوڑ کر رکھ دیا کرتی تھی۔ بلاشبہ سلطان باہو ایسا سرچشمۂ علوم و فیوض ہیں، جن کے در سے خواص و عام سبھی نے فیض پایا ہے اور یہ فیض آج بھی جاری و ساری ہے۔ آپ نے جمعرات/جمعہ کی شب یکم جمادی الثانی 1102 سن ہجری بمطابق یکم مارچ 1691 بوقت عصر اکسٹھ برس کی عمر میں اس جہانِ فانی کو الوداع کہا اور اپنے خالق کے حضور حاضر ہو گئے۔ آپ کا مزار مبارک گڑھ مہاراجا ضلع جھنگ پاکستان میں واقع ہے، جہاں  ہر سال آپ کا عرس جمادی الثانی کی پہلی جمعرات کو بڑی دھوم دھام سے منایا جاتا ہے۔

آپ کی تصانیف؛

مشہور ہے کہ آپ نے ایک سو چالیس کتابیں تصنیف کیں جن میں سے بہت سی کتابیں اب ناپید ہو چکی ہیں، تاہم اب بھی آپ کی 41 عدد کتابیں مرتب کی جا چکی ہیں۔ آپ کے واحد پنجابی کلام کو ابیات باہو کے نام سے مرتب کیا گیا ہے۔ اس میں کوئی شک نہیں کہ آپ کی نصیحت آمیز پنجابی و فارسی شاعری کو عالمی شہرت حاصل ہے۔

ابیات باہو (پنجابی)*

اسرار القادری (فارسی)*

امیر الکونین (فارسی)*

اورنگ شاہی (فارسی)*

توفیق ہدایت (فارسی)*

تیغِ برہنہ (فارسی)*

جامع الاسرار (فارسی)*

حجۃ الاسرار (فارسی)*

دیدار بخش خورد (فارسی)*

دیدار بخش کلاں (فارسی)*

دیوان باہو (فارسی)*

رسالہ روحی شریف (فارسی)*

سلطان الوہم خورد (فارسی)*

سلطان الوہم کلاں (فارسی)*

سیف الرحمٰن (فارسی)*

شمس العارفین (فارسی)*

طرفۃ العین(حجت الاسرار) (فارسی)*

عقل بیدار (فارسی)*

عین العارفین (فارسی)*

عین الفقر (فارسی)*

فضل اللقاء خورد (فارسی)*

فضل اللقاء کلاں (فارسی)*

قرب التوحید (فارسی)*

قرب دیدار (فارسی)*

کشف الاسرار (فارسی)*

کلید التوحید خورد (فارسی)*

کلید التوحید کلاں (فارسی)*

کلید جنت (فارسی)*

گنج الاسرار (فارسی)*

مجالسۃ النبیؐ (فارسی)*

محبت الاسرار (فارسی)*

محک الفقراء خورد(فارسی)*

محک الفقراء کلاں (فارسی)*

محکم الفقراء (فارسی)*

مفتاح العارفین (فارسی)*

نورالھدیٰ خورد (فارسی)*

نورالھدیٰ کلاں (فارسی)*

جواہر سلطانی (فارسی)*

توفیق الہدایت (فارسی)*

تلمیذالرحمٰن (فارسی)*

گنجِ دیں (فارسی)*

٭٭٭٭٭٭٭٭٭٭٭٭٭٭٭

نمونۂ پنجابی کلام؛

٭٭٭٭٭٭٭٭٭٭٭٭٭٭٭

الف۔الله چمبے دی بوٹی، میرے من وچ مرشد لائی ہو 

نفی اثبات دا پانی مِلسیں، ہر رگے ہر جائی ہو 

اندر بوٹی مُشک مچایا، جاں پُھلاں تے آئی ہو

جیوے مرشد کامل باہو، جیں ایہہ بوٹی لائی ہو

٭٭٭٭٭٭٭٭٭٭٭٭٭٭٭

الف-ایہہ دنیاں زن حیض پلیتی، کیتی مل مل دھوون ہو

دنیاں کارن عالم فاضل، گوشے بہہ بہہ روون ہو

جیندے گھر وچ بوہتی دنیا، اوکھے گھوکر سوون ہو

جنہاں ترک دنیاں تھیں کیتی باہو، واہندی نکل کھلوون ہو

٭٭٭٭٭٭٭٭٭٭٭٭٭٭٭

الف-اندر کلمہ کِل کِل کردا، عشق سکھایا کلماں ہو

چوداں طبق کلمے دے اندر، قرآن کتاباں علماں ہو 

کانے کپ کے قلم بناون، لکھ نہ سکن قلماں ہو

باہو ایہہ کلمہ مینوں پیر پڑھایا، ذرا نہ رہیاں اَلماں ہو

٭٭٭٭٭٭٭٭٭٭٭٭٭٭٭

ب-باجھ حضوری نہیں منظوری، توڑے پڑھن بانگ صلاتاں ہو

روزے نفل نماز گزارن، توڑے جاگن ساریاں راتاں ہو

باجھوں قلب حضور نہ ہووے، توڑے کڈھن سَے زکاتاں ہو

باجھ فنا رب حاصل ناہیں باہو، ناں تاثیر جماعتاں ہو 

٭٭٭٭٭٭٭٭٭٭٭٭٭٭٭

پ-پنجے محل پنجاں وِچ چانن، ڈیوا کِت ول دھریئے ہو

پنجے مہر پنجے پٹواری، حاصل کِت ول بھریئے ہو

پنجے امام تے پنجے قبلے، سجدہ کِت ول کریئے ہو

باہوجے صاحب سر منگے، ہرگز ڈِھل نہ کریئے ہو

٭٭٭٭٭٭٭٭٭٭٭٭٭٭٭

نمونۂ فارسی کلام؛

٭٭٭٭٭٭٭٭٭٭٭٭٭٭٭

ترانۂ عشق

ہر منتہی آغازِ من

کس نیست محرم رازِ من

مگسی کجا شہبازِ من

در عشق اُو پروانہ ام

از جانِ خود بیگانہ ام

ہر انتہا میری ابتدا ہے

میرے راز کا محرم کوئی نہیں

کہاں مکھی اور کہاں میرا شہباز

میں اُس کے عشق کا پروانہ ہوں

اپنی جان سے بیگانہ ہوں

کونین واصل یک قدم

اللہ بس ما را چہ غم

ایں نفس را گردن زنم

در عشق اُو پروانہ ام

از جانِ خود بیگانہ ام

کونین(دونوں جہان) میری طے کا ایک قدم ہیں

اللہ میرے لیے کافی ہے مجھے اور کچھ نہیں چاہیے

کہ میں اپنے نفس کی گردن اڑا چکا ہوں

میں اُس کے عشق کا پروانہ ہوں

اپنی جان سے بیگانہ ہوں

زاہد کجا بس دور تر

از وصل عاشق بیخبر

ایں مدعی اندر دہر

در وحدتش پروانہ ام

از جانِ خود بیگانہ ام

زاہد وصالِ حق سے بہت دُور ہے

وہ عاشق کے مراتبِ وصل سے بے خبر ہے

کہ اُس کی تگ و دو اسی جہان تک محدود ہے

اس کے برعکس میں وحدتِ حق کا پروانہ ہوں

اپنی جان سے بیگانہ ہوں

ای عالما علمش بخر

این جاہلانِ گاؤخر

جز عشق حق دیگر مبر

در عشق اُو پروانہ ام

از جانِ خود بیگانہ ام

اے عالم! اپنا علم

اِن جاہل بیل گدھوں کو سونپ دے

خود عشقِ حق کے سوا ہر چیز سے دست بردار ہو جا

میں اُس کے عشق کا پروانہ ہوں

اپنی جان سے بیگانہ ہوں

باہو بہ یاہو یار شد

چوں بختِ من بیدار شد

با ہم نشین دلدار شُد

در عشق اُو پروانہ ام

از جانِ خود بیگانہ ام

اے باہو! میں یا ہو (ذاتِ حق تعالیٰ ) کا یار بن گیا ہوں

میرا بخت جاگا تو مجھے دلدار کی ہم نشینی نصیب ہو گئی

میں اُس کے عشق کا پروانہ ہوں

اپنی جان سے بیگانہ ہوں

٭٭٭٭٭٭٭٭٭٭٭٭٭٭٭