پنجابی سرائیکی شاعری
گرمی دے وچ بھاہ تے کھڑ تے تکا لاونڑاں پوندے
ساکوں زندگی ریڑھنڑ کیتے دھکا لاونڑاں پوندے
کلھا مزدوری تے وینداں پوری کینی پوندی
کم تے اکثر میکوں بچڑا نکا لاونڑاں پوندے
چندے والے ڈبے اتے کہیں دی دید نی پوندی
مسجد دا دروازہ تہوں تاں جھکا لاونڑاں پوندے
اے فطرت ہے چنگیں دے نال مندے رنگیئے ویندن
مٹھے خربوزے دے کٹھے پھکا لاونڑاں پوندے
شاہیں دے دربار اچ ساڈی حاضری ایں تھیندی اے
دربانیں دی تلی اتے سکا لاونڑاں پوندے
کھیر نہ ویچوں جیکر ساڈے بال نی بکھ توں سمھدے
بکھے گابے دے ونج منہ تے چھکا لاونڑاں پوندے
کھبی اکھ کوں نوٹ جواری جتنڑ دا گر ڈسیئے
بیگم بادشاہ جوکر رلے اکا لاونڑاں پوندے
فیضنڑ اھدے سوہنڑی شئے کوں جلدی نظراں لگدین
نت اوندے رخساریں اُتے ٹکا لاونڑاں پوندے
فیض بلوچ
No comments:
Post a Comment
Note: only a member of this blog may post a comment.