جدید پنجابی شاعری
مائے نی کل رات
اجے ہوئی نئیں سی سرگھی
ہر شے سی اوہدے ورگی
میرے ویہڑے آ گیا چور
جد پا دتا میں شور
فیر گل ہوئی نہ بات
مائے نی کل رات
مکھ سر میرے چوں کڈھی
میرے منہ چوں بولی وڈی
میرے کھوہ کے لے گیا ہوش
دس میرا کیہہ دوش
چپ ہو گئے پھل تے پات
مائے نی کل رات
میرے کنیں دتا رُوں
میں چاں کیتا نہ چُوں
میں ہو کے گونگی بولی
گئی چڑھ سمے دی ڈولی
مینوں بُھل گئی میری ذات
مائے نی کل رات
میرے ہتھ پھڑا کے چھنی
وچ جھاڑ گیا اوہ کنی
میں ویکھ کے کیتا واہ
توں چور نیں ہے شاہ
ہُن پیکا دے گیا رات
مائے نے کل رات
میری خالی کر کے کھوپڑی
میرے دل دی ٹِکی چوپڑی
دل رکھ دتا میرے کول
جویں لج نال بدھا ڈول
میں ڈبی وچ فرات
مائے نی کل رات
شکیلہ جبیں
No comments:
Post a Comment
Note: only a member of this blog may post a comment.