جدید پنجابی شاعری
اج تک مینوں یاد ہے تیرا، ملنا جاندی واری
اکھ وچ سِکاں، دل وچ سِکاں، لوں لوں دے وچ سِکاں
لا لا بُلھیاں دے نال بُلھیاں، ہِکاں دے نال ہِکاں
لام تے جاندی واری، جد ونڈیاں سن چِھکاں
دو دِلاں دے جذبیاں دی اوہ سوڑ، اوہ سوڑ آپ مہاری
اج تک مینوں یاد ہے تیرا، ملنا جاندی واری
ڈُونگھے ساہ لے لے کے تے اکھیاں وِچ اکھیاں پانا
اکھیاں وِچ اکھیاں پا پا کے، تانگھاں نُوں ہور جگانا
نِکے نِکے ہٹکورے بھر بھر دسنی بے قراری
اج تک مینوں یاد ہے تیرا، ملنا جاندی واری
گل لگ لگ کے وِدیا ہونا، رہ رہ کے گل لگنا
دل دِیاں دل وِچ رہیاں دا، مُڑ ہنجھو بن بن وگنا
آپو وچ تسلیاں دے دے، ہتھوں ہور وی ٹھگنا
رب حوالے اک دُوجے نوں، کرنا وارو واری
اج تک مینوں یاد ہے تیرا، ملنا جاندی واری
سُنیا مُک پئے ہِن پینڈے، سُنیا مُک پئیاں ہین لاماں
آ ماہی جھب آ، میں منیاں ہویاں کئی سلاماں
نین پکا لئے تیرا راہ تک تک کے اساں غلاماں
آ ماہی ہن بھاری لگدی، اے برہا دی کھاری
اج تک مینوں یاد ہے تیرا، ملنا جاندی واری
شریف کنجاہی
No comments:
Post a Comment
Note: only a member of this blog may post a comment.