جدید پنجابی شاعری
چپ دی قید
صدا سدھراں دے پھڑکن دی
تے چپ سینے دے اندر چپ
اداسی دے سمندر وچ بھنور مایوسی دے کِھڑدے
بھنور مایوسی دے اندر ابھردی ہاسیاں دی لہر
تھکے جسماں دے اندر پولی پولی ٹردی جاندی زہر
صدا شیشے دے تڑکن دی
تے چپ قبراں توں ڈونگھی چپ
تے قبراں ٹردیاں قبراں دی کُکھ اچ شعراں دے کج پُھل
جنہاں دا کتھے وی نی مل
جنہاں نوں ویکھ کے لٹھے کبوتر راہواں جاندے بھل
صدا ہنجوآں دے تلکن دی
تے چپ چڑھدی ہنیری توں ذرا پہلاں دی کالی چپ
تے کالی چپ جیویں اس سانولی دی گُت چ گُجھی شام
چُپیتی سینے دے اندر سرکدی تیغ ِخون آشام
مینوں معلوم ہے انجام
صدا نبضاں دے پھڑکن دی
تے چپ جیوں ساہ رک جاون
اڈیکاں دے سفر وچ آساں دیاں اُڈدیاں دھوڑاں
کئی اس ڈر دے لمبے پینڈے وچ ہڈیاں چَھنڑک جاندے
کئیاں دے ماس بُھر جاندے
کئی رستہ بھٹک جاندے
صدا روحاں دے کنبن دی
تے چُپ گُھپ موت ورگی چُپ
تے چپ دی شاہ کالی قید اندر ڈردا ہویا میں
گھٹن دی تازہ اگ نوں ساہنواں اندر بھردا ہویا میں
کسی نوں نی نظردا ہولی ہولی مردا ہویا میں؟
امیر سخن
No comments:
Post a Comment
Note: only a member of this blog may post a comment.