پنجابی سرائیکی شاعری
لیبر ڈے
اج وت ٹھڈے کمرے دے وچ
وڈیاں سوہنیاں کرسیاں اُتیں
سماج سُدھارک سڈیجن والے رَل تے بہسن
ملٹی نیشنل کمپنی والا مِنرل واٹر پیسن
ساڈے بارے گالھ کریسن
گالھ کریسن؛ مزدوری بہوں اوکھا کم اے
مزدوریں دا جیون وی کوئی جیون ہوندے
مزدوریں کوں حق نی مِلدا
زور زور دیاں تاڑیاں وجسن
سیمینار دا ڈرامہ مُکسی
سارے رل تے ون سونی مانی کھاسن
اپنے گھر ونڄ سُمسن
ساکوں ڈیکھن کوئی نہ آسی
اڄ دے ڈینہہ وچ ساڈے ہتھ تے کتنے نویں چھالے اُبھرین
گھر وچ بکھ کیوں نچدی پئی اے
جندڑی دا ہر لمحہ سر تے بار کیوں بن گئے
ہر ڈینہہ ساکوں کیوں لگدا ہے سال نہ پچھسی
ساڈا کوئی وی حال نہ پچھسی
شکیل انجم لاشاری
No comments:
Post a Comment
Note: only a member of this blog may post a comment.