جدید پنجابی شاعری
رتبے، عہدے، ذات، قبیلے، صورتاں نے پہچان دیاں
عزتاں ورنہ ہین برابر دنیا تے انسان دیاں
رنگ برنگے ملک نے ایتھے اک دُوجے توں ودھ چڑھ کے
اُچیاں نیں پر جگ دے اندر شاناں پاکستان دیاں
چن، مریخ تے پہنچ گئے نیں پانویں لوکی اج کل دے
ساہواں فیر وی مُشکل ایتھے محنت کش دہقان دیاں
پل پل اوکھا ہو جاندا اے جیون دا اس دنیا تے
آ جاون جد گھڑیاں یارو سَدھراں دے دفنان دیاں
مِٹھڑے بول محبت والے رام دلاں نوں کردے نیں
کاہدے لئی فیر تیر تفنگ تے تڑھیاں مرن مران دیاں
اوکھیاں سوکھیاں راہواں اُتے پباں پہار تُوں ٹُردا جا
اک دن منزل ملسی تینوں لوڑاں نئیں گھبران دیاں
سب کجھ حاصل کیتا عاکف آ کے میں وچ پیرس دے
بُھلیاں نہیں پر گلیاں مینوں اپنے پنڈ مرجان دیاں
عاکف غنی
No comments:
Post a Comment
Note: only a member of this blog may post a comment.