جدید پنجابی شاعری
مشین مزدور دا ہاڑا
ہڈاں دی اَگ بال بال کے لویا پانی کِیتا
اکھاں ڈھال کے پُرزے ڈھالے، جام دُھوئیں دا پیتا
لال بھبھاکا بلدے لوئے مُنہ وی کیتا لال
مُڑھکا نہراں وانگوں وگیا اتھروواں دے نال
دُوں اگاں دا بالن بن گئے، خُون رہیا نئیں تُومبا
سِر تے جیٹھ ہاڑ دا سُورج، سامنے دوزخ لُومبا
کھروا کم اے، کھروا چم اے، بُھل گئے بول نروئے
لوئے دے نال لڑ دے بِھڑ دے آپ وی لویا ہوئے
جے ذرا آرام نُوں بہیے، جھٹ پٹ مالک سدن
صبح سویرے پھڑن مشیناں، شاماں ویلے چھڈن
انگ انگ دا زور پئے لائیے، جیوں بھٹے دے کھوتے
انت مہنگائی پیسے لے گئی، رہ گئے کھلے کَھلوتے
اُٹھدیاں، بہندیاں ایہو چِنتا دل وِچ سُوئیاں چوبے
جوڑ جوڑ تے ساڈے بھج گئے، سیٹھ نے جوڑے بوبے
میں ای سیٹھ دی فیکٹری دے وِچ اے سی روز بناناں
میں ای آپنے بچّے حبس تے گرمی وِچ سواناں
اِکّو دن وِچ ساڈیاں بانہواں سو مشیناں جوڑن
فِر وی ساڈیاں ماواں بھیناں ہتھ نال کپڑے دھوون
چُپ بھلی اے، دِھر دِھر اگّے کیہڑا پھولن پھولے
رات دِنے مزدوری کر کے خالی رہن بھڑولے
میرے دل وی شوق اُٹھدا اے روز نہاری کھاواں
چکن کڑائی، تِکے، پاوے، چِڑے، بٹیر اُڈاواں
کِسے دُکان بدام جے ڈِٹّھے، دل وِچ حسرت آئی
چھاء ویلے پُتّر نوں آکھاں، آ پی لے سردائی
سڑکاں اُتّے عُمر گواچی، لبھدے رئے دہاڑی
تگڑے ہَتّھاں لِخ دِتّی اے ساڈی قسمت ماڑی
ست اسمانی بیٹھیا ربّا، تیری ونڈ نِرالی
کہیاں دے گھر لہراں بہراں، کہیاں جھولی خالی
شہزاد نیر
No comments:
Post a Comment
Note: only a member of this blog may post a comment.