جدید پنجابی سرائیکی شاعری
آٹا
کنڑک دے سٹاں ءچ اپنڑی دھیاں دا ڈاج ڈیہدے
تاں ڈینہ نی ڈیہدا نہ رات ڈیہدے
او اپنڑے بنے تائیں اپنڑی ساری کائنات ڈیہدے
ہوا دی ہیلک دے نال ہلدے کنڑک دے سٹے کوں
دھی دی والی سمجھ کے چمدے
تے رڑھ کوں دھی دی ردا سمجھ کے کہیڑ راتیں رڑے تے سمدے
او تیلے تیلے کو اپنڑی دھیاں دے نک دے تیلے سمجھ کے چنڑدے
تے بوٹے بوٹے دے پیریں ڈھہہ ڈھہہ کے رزق پنندے
بے موسمے مینہ دی گاج سنڑ کے
مہاڑیاں تے کھڑی ہوئی دھیاں دے سر تے رکھے قرآن ڈیہدے
تاں اکھ دے بدلاں کوں ہاں دی کندھ نال ڈک کے
کندھاں دے اولھے گھنندے
او جیندے ہتھاں دے پھسدے چھالاں تھوں
اللہ سجداں دے کتنے محراب وار ڈینداں
تو کیا سمجھسیں او جٹ دے ڈکھ کوں
او جیندی دھیاں دا ڈاج لٹ کے
اوہو لٹیرا ول اونکوں اٹا ادھار ڈیندے
دعا کرینداں جو شالا محشر دے بعد
عدالت دی گالھ سچی ہووے خدایا
میں اپنڑی دھیاں دے سامنڑے
کہیں تھوں اپنڑی دھیاں دا ڈاج گھنڑیں
میں ڈھیر سارا حساب گھنڑیں
مومن مولائی
No comments:
Post a Comment
Note: only a member of this blog may post a comment.