جدید پنجابی شاعری
لوڑ پوے تے تیرے شہروں
پیرا سِیٹامول نئیں لبھدی
کھنڈ انبراں تے ٹُر جاندی اے
گنڈے مُکھ پرتا جاندے نیں
لال ٹماٹر پیلے ہو کے
اک دُوجے نوں کھا جاندے نیں
لوڑ پوے تے تیرے شہروں
ماسا وی انصاف نئیں ملدا
لوک وچارے اک دُوجے دا
منہ ای تکدے رہ جاندے نیں
کچیاں کندھاں وانگر اکثر
اِک اِک کر کے ڈھہ جاندے نیں
لوڑ پوے تے تیرے شہروں
اکلاپے نوں دُور کرن لئی
اک وی چَج دا یار نئیں لبھدا
گُھٹ کے جپھی پان دی خواہش
دل ہی دل وچ مر جاندی اے
بندا کلا رہ جاندا اے
لوڑ پوے تیرے شہروں
ادھی روٹی دُور دی گل اے
پانی دا اک گُھٹ نئیں لبھدا
بُلھ ترہائے رہ جاندے نیں
سُکی جیبھ توں گل نئیں ہُندی
لوڑ پوے تے شہر چ تیرے
ہَتھ ای مَلدے رہ جانے آں
جھلے بن کے بہ جانے آں
احمد نعیم ارشد
No comments:
Post a Comment
Note: only a member of this blog may post a comment.