پنجابی سرائیکی شاعری
میکوں پتہ اے
وطن دے اے حالات کیوں تھئے
چمن کوں کیں ہے آن اجاڑیا
قصبے کیوں برباد تھئے ہن
وستیاں کوں اتھ کیں ہے ساڑیا
کیں اپنی چودھراہٹ کیتے
شہراں کوں ویران کیتا ہے
ملک دا اے نقصان کیتا ہے
میڈے قلم وچ سچ لکھن دی طاقت ہے پئی
وت وی میں سچ لکھ نئیں سگدا
کیوں جو جے کر میں سچ لکھیا
لوکاں کوں سبھ حال سنائے
کجھ چٹے کپڑیاں تے
گندے چھینڈے لگسن
کئی نورانی ڈسدے چہریاں دی
کالک یار نشابر تھیسی
ول ایں ملک دے اصلی حاکم
شور مچیسن
میں رستے توں گم تھی ویساں
یا وت میکوں وطن دا دشمن آکھ تے
سولی چاڑھ چھڑیسن
میڈے وانگوں
میڈے دیس دا ہر ہک واسی اپنی جاہ تے
ایجھیاں کئی زنجیراں اندر جکڑیا ہویا اے
ول وی اساں سارے خود کوں
پئے آزاد سڈیندے ہیں
اپنی ایجھی آزادی دا
کوڑا جشن منیندے ہیں
شکیل انجم لاشاری
No comments:
Post a Comment
Note: only a member of this blog may post a comment.