جدید پنجابی شاعری
خیال مردے نئیں ہوندے
نی کُڑے
ٹھنڈی اگ دا کؤڑا گُھٹ بھر
تے متھے تے کھڑی تیجی اکھ نال
بت بنے ویلے نوں گُھوری وٹ
ایویں رسے کیوں وٹدی رہنی ایں
خیال مردے نئیں ہوندے
کوئی اکھ اے جو تیرے خیال پڑھ لیندی اے
کوئی خیال اے جو اپنا جوڑا لبھ لیندا اے
دو خیالاں دے جوڑے نے
اک نواں خیال جنمیا اے
جیہدا اجے کوئی نام نئیں رکھیا گیا
کیویں رکھدے ؟
پیو دے خانے وچ ماں دا نام کون قبولدا
جیس سچ نوں سمے دی ککھ نہ سانبھ سکی
اوہنوں جھوٹ دا پنگُھوڑا کون جُھوٹن دیندا
جس ہوند نوں چھلے وچ امرت دھارے دی گُڑھتی دے دتی گئی ہووے
اوہ زہر دا سواد کیہ دسے
خیال مردے نئیں ہوندے
بس لفظاں دیاں قبراں وچ ادھ موئے پئے سہکدے رہندے نیں
کسے سُولی دا پھاہ اونہاں دے گل وچ پورا نئیں اوندا
توں ایویں رسے کیوں وٹدی رہنی ایں
انجم سلیمی
No comments:
Post a Comment
Note: only a member of this blog may post a comment.