پنجابی عارفانہ کلام
تسی او امیداں دے باغاں دے مالی
تے آقاؐ اسی آں پَھلاں دے سوالی
تواڈی عنایت بڑا آسرا اے
تھکے پنچھیاں نوں اے شاخاں تے ڈالی
تواڈا کرم جے نہ شامل ہووے گا
نری مال و دولت دی بارش اے کالی
مدینے چوں آؤندی عطا دی گھٹا جو
او کاسے چہ کر دی اے دامن نوں خالی
جے کنڈے وی گڈیے تے پھل اگ نیں پیندے
مدینے دی دھرتی بڑی اے مثالی
تسی آسرا دتّا ہتھ چہ رکی اے
مقدر دی ڈوری نکل جان والی
خدا تیری حکمت توں قربان عمران
مدینے دی لو نال دنیا اجالی
عمران شریف
No comments:
Post a Comment
Note: only a member of this blog may post a comment.