پنجابی عارفانہ کلام
دھپاں مڑیاں ٹھنڈیاں چھاواں آئیاں نیں
مہکاں نعت کیاری جد دیاں لائیاں نیں
پورب پچھم اتر دکھن کتھے نئیں
چارے پاسے نعت دیاں رشنائیاں نیں
مٹھے مٹھے بول کسے دے نئیں اینے
ماں بولی نیں رمزاں دل دیاں پائیاں نیں
دل توں نکلی گل جا دل نوں لگدی اے
گلاں اوہو جو سوہنے فرمائیاں نیں
آپ دے کول تے نور ہدایت والا اے
آپ توں دور جہان دے وچ گمراہیاں نیں
دو جگ دا سردار حلیمہ لے گئی بس
رہ گئیاں ہتھ ملدیاں ساریاں دائیاں نیں
فیضی بخت سولّہ آپ دے منگتے دا
منکراں دے لئی ہر پاسے رسوائیاں نیں
مبشر حسین فیضی
No comments:
Post a Comment
Note: only a member of this blog may post a comment.