دل وچ نیں اوہدے پیار دیاں کیہ بھبکاں تساں کیہ دساں
کیہ میتھوں دل دیاں پچھدے او میں دل دیاں دساں کیہ دساں
اج اوہدے سامنے ٹھپے رہِ سب دفتر گِلہ گزاری دے
بے وسی جئی کیوں وسی اے اج دل دیاں وساں کیہ دساں
قدماں تے اوہدیاں شرماں تے سر رکھے ہار سنگھاراں نے
اج اوہنے کیڈے ظلم دیاں کڈھیاں سن ٹساں کیہ دساں
سرمے دی سان تے لگی سی دھار اوہدیاں کھیویاں نیناں دی
لگیاں سن نظر دے تیراں نوں کجلے دیاں چساں کیہ دساں
کیہ دساں منہ پیا سکدا اے کیوں میرا جی جی کردا اے
اوہ مینوں ایویں مارن پے کیوں دباں دھساں کیہ دساں
جاؤ دسو بدلو ساون دیو نہ پچھ نی بجلیے لشکدئے
کیوں ہسدا ہسدا روواں میں کیوں رو رو ہساں کیہ دساں
سوکے تے کیہڑی سدھر دے ہنجواں دی مست پھوار پئی
وس گئیاں کدھر ہاواں دے بدلاں دیاں لساں کیہ دساں
کیوں اوہدی شوخ نگاہ اج پئی شرماں وچ ڈبدی جاندی اے
کیوں پلکاں نال اج اوہدیاں میں پیا تلیاں جھساں کیہ دساں
اکھاں تھیں دل وچ اتر کے کوئی دل دا ڈیرہ چھڈ گیا
ایس اجڑے گھر وچ کیکر میں پیا وساں رساں کیہ دساں
کیوں رند کوئی بت خانے نوں کعبے دا پوکھا دیندا نئیں
میں بت خانے ول کعبے تھیں پیار اٹھ اٹھ نساں کیہ دساں
کیہ دساں اوہدے پیاراں نے چا کہڑے رستے پایا اے
کیوں اساں فراقاں وصلاں دے سر پائیاں بھساں کیہ دساں
اوہ ہمدم جدوں فقیرؔمیرا پیا دم دم دم وچ وسدا اے
کیوں گاواں گیت وراگاں دے وچ اوہدیاں جساں کیہ دساں
ڈاکٹر فقیر محمد فقیر
