فیر ملن دی خواہش
شام پئی تے دیوے بال کے
رکھاں وچ گلاباں دے
مہکی مہکی خُشبو اس دی
رنگ سن ہور چراغاں دے
رستے پئے اجاڑ سن اگے
اک تھکن سی یاداں دی
اڈیکاں دے وچ زہر سی بھریا
منظراں کالیاں ناگاں دے
اک خاہش سی ملن دی اس نوں
کنے رنگ بدلی سی
اک سہانی رات دا قصہ
رکھاں پچھے باغاں دے
ویلے دے نال ودھدی جاندی
رنگت ہور اذیت دی
اکھاں دے وچ ٹھہر گئے سن
موسم لال عذاباں دے
اس دے نالوں دکھ سن چنگے
نال تے میرے رہندے سن
چھڈ جاندے سن رستے دے وچ
رنگ سن دھندلے خواباں دے
یوسف رند
No comments:
Post a Comment
Note: only a member of this blog may post a comment.