نکی جئی اک بھل تے میں

 جدید پنجابی شاعری

نِکی جئی اک بُھل تے میں

یاداں دی کُلبُل تے میں

ڈِگن والے ہو گئے آں

وِچ اڈیکاں پُل تے میں

اوہلا کِیتا ہاسے نے

اِنج جانا سی رُل تے میں

لگیا نا کوئی گاہک مِرا

تکڑی جاندا تُل تے میں

چانن فِر وی ہویا نئیں

ایویں ہویا گُل تے میں

سوہنے مُکھڑے وِکدے رہن

دے نئیں سَکدا مُل تے میں

عشق شکنجے چھڈیا نئیں

کِیتی سی ہِلجُل تے میں

اوپرا اوپرا لگدا سی

بیٹھا اپنے قُل تے میں

اِکو جِناں سڑدے رہے

اپنی اگ وِچ چُل تے میں

اِکو جہے ای لگدے آں

عابد سُکیا پُھل تے میں

عابد عمر