جدید پنجابی سرائیکی شاعری
طلب تاں بے طلب سے ہے ایندا امکان نئیں ہوندا
اونویں ارمان بہوں ہوندن اونویں ارمان نئیں ہوندا
اے او نگری ہے جیندے وچ محبت بہوں وڈا جرم ہے
اتھاں بہوں لوک ملدے ہن اتھاں انسان نئیں ہوندا
میڈے لیکھ اچ خسارے ہَن خسارے ہِن تے ہوسن پئے
میں اوں ڈینہہ بہوں ڈریا رہندا جڈاں نقصان نئیں ہوندا
پتے توں کون ہیں کیڑھی گجھی نگری دا پاندھی ہیں
اتھاں بھنبھور کوئی کائے نی اتھاں مکران نئیں ہوندا
تڈاں سوہنی دے روونڑ دی ہے کئو آندی کنارے توں
جڈاں اہدن چنانہہ دے وچ کئی طوفان نئیں ہوندا
اے گھر تیڈا ہے در تیڈا توں آ جیں وقت دل آکھی
جینکوں دل وچ ٹکیندے ہو کڈی مہمان نئیں ہوندا
تیکوں تاں علم ہے اصغر توں مجنوں کوں ڈساویں ہا
"محبت وچ قدم رکھنڑا ایڈا آسان نئیں ہوندا"
اصغر گورمانی
No comments:
Post a Comment
Note: only a member of this blog may post a comment.