شالا جیوے روا ڈتا ہس میں درد تیڈے کوں داد ڈینداں

 جدید پنجابی سرائیکی شاعری

شالا جیوے رُوا ڈِتا ہِس، میں درد تیڈے کوں داد ڈینداں

نِیر اکھ توں وہا ڈتا ہِس، میں درد تیڈے کوں داد ڈینداں

سُچیندا ہامی جو تھی گئے پتھر، ایں دل کوں ہُنڑ کُئی ہلا نئیں سگدا

ہولہ کر کے ہَلا ڈِتا ہِس، میں درد تیڈے کوں داد ڈینداں

رب توں منگنڑ، میں مِیت آ گیاں، جہان پِھر پِھر مسِیت آ گیاں

رب دا در ول ولا ڈتا ہِس، میں درد تیڈے کوں داد ڈینداں

اے کیا تِھیا ہے، وِپھل گیا ہے جو روندیں روندیئیں اے کِھل پِیا ہے

ہجر دا چیتا رلا ڈِتا ہِس، میں درد تیڈے کوں داد ڈینداں

شہریں رولاں یا بَر ڈِکھانواں، عشق ہاں مَیں جو کر ڈِکھانواں

اے نُکتہ میکوں ڈسا ڈِتا ہِس، میں درد تیڈے کوں داد ڈینداں

پڑھاں میں الحمد چِرک نئیں تھیا، شکُوک مارئیے توں شِرک نئیں تھیا

بشر کوں آصف خدا ڈتا ہِس، میں درد تیڈے کوں داد ڈینداں

آصف لنگاہ