جدید پنجابی سرائیکی شاعری
میکوں جوڑیں دا مسئلہ ہا چوبارے لوڑھ کائناں ہن
اساں مدتیں دے وانڈھیں کوں چھوہارے لوڑھ کائناں ہن
تئیں میڈی برتھ ڈے تے اے تکلف خواہ مخواہ کیتے
اے جیڑھے گھن تے آئیں اینجھے غبارے لوڑھ کائناں ہن
خدا گالی چھڑیں سودھی تئیں کھجی چھانڈ لاتھی اے
فقط چھوڈے ضرورت ہن بوھارے لوڑھ کائناں ہن
انویں چندرے کوں چندرا سو کلو میٹر توں لبھ گھندے
کنوارے ڈھیر ہاسے گھر کنوارے لوڑھ کائناں ہن
جڈاں ہک توتلی چھوہر سنڑائے گانا مجھے رنگ دے
مقرر دیں آوازیں دے سہارے لوڑھ کائناں ہن
تیڈا اخلاص ٹھکراونڑ نئیں دل آکھیا تاں منگیئے می
جے سچ پچھدیں میکوں پیسے ادھارے لوڑھ کائناں ہن
حکیم اہدے بڈھیپے وچ زہر دی بھوری کافی ہئی
کتیرا، گوند، حلوہ، مغز چارے لوڑھ کائناں ہن
لگی ہک ڈانگ سر وچ دھاڑ کر تے اندھا اہدا ہا
میں اندھا ٹھیک ہامی اے ستارے لوڑھ کائناں ہن
ولہٹیس تھال بریانی دا ہتھ اڈ مولوی آکھیا
اے بندہ نیک ہا اینکوں سپارے لوڑھ کائناں ہن
اوندیں اکھیں دا جھمکنڑ ہا اساں کھیسے چھنڈک آئیوں
او فیضنڑ تونڑیں گنگی ہئی اشارے لوڑھ کائناں ہن
فیض بلوچ
No comments:
Post a Comment
Note: only a member of this blog may post a comment.