پنجابی سرائیکی شاعری
دوزخ ڈتی گئی کئیں کوں جنت ڈتی گئی
باقی ہاجیڑھا کوئی اوکوں غربت ڈتی گئی
پروردگار! ڈس ناں اساں ہنڑ کراڑ تھیؤں
انگریز کوں زمانے تے دولت ڈتی گئی
بھینڑیں جے ہوس ہا تاں او کھوہ ہچ نہ ڈھاوے ہا
یوسف دے ہن بھرا تہوں نفرت ڈتی گئی
مویا جیڑھا جہان ہچ محبت دے ناں اتے
مرنڑ دے بعد اوکوں محبت ڈتی گئی
تھاں دھو گھناں میں پہلے ول تھیسی ساڈی گاہل
تھاواں کوں ساڈی ذات تے سبقت ڈتی گئی
ابلیس خوش نصیب ہے جیسی حشر تائیں
ساکوں تاں چار ڈینہاں دی مہلت ڈتی گئی
پنشن کما کے آسی تاں کوٹھے پکے ہوسن
جھنڈے دے وچ ولیٹھی ہوئی میت ڈتی گئی
نوشیروان اسفند
No comments:
Post a Comment
Note: only a member of this blog may post a comment.