جدید پنجابی شاعری
قیدی عشق دی زلف زنداں وچوں ہندے اساں نہ کدی آزاد ویکھے
دھریاں سراں اتے رکھن نت باہیں کردے روز اک نویں فریاد ویکھے
میرے ٹٹ گئے پر پر اجے توڑیں خطرہ تیلیاں دے ٹٹ جان دا سو
ایسے واسطے آوے تے چاچا کے میرے قفس نوں پیا صیاد ویکھے
منتظر بیٹھی نرگس مدتاں دی شوقِ دید اندر اکھاں میٹدی نئیں
تساں باغ ول جانا ئیں تے کدوں جانائیں چک چک اڈیاں شمشاد ویکھے
دل نوں تاہنگ سی دار سہارنے دی نئیں ساں اوس شہزور دے وار جوگا
ویکھاں میں جلاد دے منہ ولوں میرے منہ نوں پیا جلاد ویکھے
رہسن بھٹھیاں دے اتے پئے لمے اجے چار دن دھوں نہ کڈھیا جے
اج ساقی دی بزم وچہ شیخ صاحب چکھدے انگلاں نال سواد ویکھے
اک وار تیرا جھلک پیا جنہوں نہ اوہ گھرجوگا نہ گھاٹ جوگا
تیری گلی اندر ستمگار لکھاں کردے اپنی عمر برباد ویکھے
کسے کھوہ کے سکھ تے دکھ دتے کسے نال ترکیب دے موہ لیا دل
بھولی شکل والے جِنے اساں ویکھے سارے ودھ توں ودھ استاد ویکھے
آخر حاسداں نے فضل من لیّاں واہ واہ خوبیاں تیرے کلام دیاں
لفظ لفظ اتے جھولن مست ہو کے شعر شعر اتے دیندے داد ویکھے
پیر فضل گجراتی
No comments:
Post a Comment
Note: only a member of this blog may post a comment.