پنجابی سرائیکی شاعری
کوئی ہوندا ہا
جیڑھا پُچھدا ہا
ڈس میلے وچ توں کیا گھنسیں
مٹی دا ہرن گھنا ڈیواں
یا کاٹھی دا گھوڑا گھنسیں
اے لاچی دانے چنگے ہن
یا گڑ دے کھیلوں کھا گھنسیں
کوئی ہوندا ہا
جیڑھا پُچھدا ہا
ڈس عید تے کیڑھا رنگ ہووے
کوئی سیپ دا چولا ٹھیک راہسی
یا جوڑا رنگ برنگ ہووے
موچی دی کھیڑی گھن ڈیواں
یا سینڈل کالے رنگ ہووے
کوئی ہوندا ہا
جیڑھا پُچھدا ہا
کیوں سگریٹ نال ہاں ساڑ ڈتی
توں بھجدیں تاں ساہ چڑھ ویندے
سوہنے ہوٹھ وی یار اُڄاڑ ڈتی
کیوں خون کوں ٻالی ویندا ہئیں
کیوں جان اپنی تیں وار کیتی
کوئی ہوندا ہا
جیڑھا پُچھدا ہا
کیوں گھر آون وچ دیر کیتی
کہیں سنگتی دے کول رہ گیا ہئیں
یا دفتر وچ کم ڈھیر کیتی
ایں خون آشام شاہر دے وچ
کیوں تئیں ہے یار سویر کیتی
کوئی ہوندا ہا
جیڑھا پُچھدا ہا
کوئی چیز لکھی تاں او سُنوا
کوئی شعر لکھی تاں ڈے میکوں
کوئی غزل لکھی تاں او سُنوا
کوئی گیت لکھی تاں ڈس میکوں
کوئی کافی ہے تاں او سُنوا
میں آکھاں ھا، کجھ نئیں لکھیا
وت بابا اے فرمیندا ہا
کوئی کافیاں، غزلاں لکھیا کر
ایں تھل دی ریت کوں شکلاں ڈے
روہی تیں نظماں لکھیا کر
ایں دھرتی دے افسانے لکھ
دامان دیاں رسماں لکھیا کر
بے ادباں کولوں دور راہویں
تیکوں ادب تاں ملئے ورثے وچ
توں ادب دے وچ مخمور راہویں
انجم دا پتر ہئیں یاد رکھیں
جُڑ وسوں نال ضرور راہویں
ایں ما دھرتی نال پیار کریں
رکھ سارے جذبے ہک پاسے
توں روہی دا اظہار کریں
انہاں لکھتاں نال توں ہر ویلھے
ما بولی دا پرچار کریں
شکیل انجم لاشاری
No comments:
Post a Comment
Note: only a member of this blog may post a comment.