جدید پنجابی شاعری
کلا بیہہ کے سوچ رہیا واں
کلا بیہہ کے سوچ رہیا واں
اپنے آپ نوں نوچ رہیا واں
کنج حیاتی لنگھ گئی ساری
چھڈ گئے سارے وار و واری
جناں لئی میں پاپ کمائے
اکھ جھپکی تے ہوئے پرائے
ڈاکہ ماریا چوری کیتی
ایویں زورا زوری کیتی
رشوت دی کوئی لوڑ تے نئیں سی
رب نے دتی تھوڑ تے نئیں سی
لُٹ لُٹ کے میں مال بنایا
اج لگدا اے کفر کمایا
ایویں دوڑاں لاندا رہیا میں
تھاں تھاں رولا پاندا رہیا میں
ویلے نے فر پلٹا کھادا
مان جوانی کرنا کاہدا
پنیاں، پٹ تے ڈولے سُک گئے
اکھاں وچوں سُفنے مُک گئے
دوڑاں، چھال پلانگاں گئیاں
آکڑ، بھڑکاں باتاں گئیاں
خَورے کس دی ہاہ لگی اے
جندڑی جیویں پھاہ لگی اے
سب نے میری کھیڈ بنائی
رشتے دار تے میرے بھائی
مینوں سُولی ٹنگ جاندے نیں
ویکھ کے مینوں لنگھ جاندے نیں
سِر نُوں ہُن میں کُھرک رہیا واں
کُھرکے سِر نوں پوچ رہیا واں
کلا بیہہ کے سوچ رہیا واں
اپنے آپ نوں نوچ رہیا واں
الیاس عاجز
No comments:
Post a Comment
Note: only a member of this blog may post a comment.