جدید پنجابی شاعری
صبر دا پیناں پانی سِکھ لے
سُکی مِسی کھانی سِکھ لے
کالے چٹے وال نیں ہو گے
تیتھوں اُچے بال نیں ہو گے
گل تے ہون سیانی سِکھ لے
رُسے ساک منا لا سارے
پرائے وی یار بنا لا سارے
دینی بس قربانی سِکھ لے
پیار دے اکھر بول پیارے
سوچ توں سانجھاں پاون بارے
رنجش ہر مٹانی سِکھ لے
اندر تیرے جذبہ ہووے
تیرے پاروں کوئی نہ رووے
صفت اے یار انسانی سِکھ لے
رنجش چھڈ تے پیار ونڈا
غرور گھمنڈ دا مندر ڈھا
انا دی کوٹھی ڈھانی سِکھ لے
جے تیتھوں کوئی مطلب منگے
کہندا گل ناں تینوں سنگے
کسے دی گل بنانی سِکھ لے
نیویاں نظراں رکھ شبیر
کدی تے چیتے کر اخیر
گزرے کیویں جوانی سِکھ لے
شبیر حسین
No comments:
Post a Comment
Note: only a member of this blog may post a comment.