جدید پنجابی شاعری
پھٹڑ ریجھاں لیراں ہاسے
کھوہ لئے نیں تقدیراں ہاسے
ماڑے ہتھ فِر پیڑاں آئیاں
ونڈ لئے فیر امیراں ہاسے
بُھکھ دے بیلے رانجھے رُل گئے
بُھل گئیاں اج ہیراں ہاسے
ہر اِک شے نوں چُپاں لگیاں
ہسن کیہ تصویراں ہاسے
جگ دے رونے جھولی پا کے
دِتے ونڈ فقیراں ہاسے
جِنے وی سن بُھکھ تے ننگ دے
وِنھ دتے نیں تیراں ہاسے
ہے وی سن تے خُرما لُٹ لئے
کُجھ مُلّاں کُجھ پیراں ہاسے
خرم چودھری
No comments:
Post a Comment
Note: only a member of this blog may post a comment.