جدید پنجابی شاعری
اپنی جِندڑی رُلدی پئی اے
پر کلے نُوں کل دی پئی اے
بھانڈے ٹینڈے سانبھ لو لوکو
لہندے ولوں جُھلدی پئی اے
ہُن میں تینوں بھیڑا ای لگناے
تیری پگ جو کُھلدی پئی اے
اٹی دے مُل وِکیا سی نا
ایتھے کس بھا تلدی پئی اے؟
میں اوہنوں کِنج بُھل سکنا واں
اوہ جو مینوں بُھلدی پئی اے
نہیں پیندا، جا کم کر جا کے
ساڈی کیہڑی ڈُلھدی پئی اے
صابر علی صابر
No comments:
Post a Comment
Note: only a member of this blog may post a comment.