جدید پنجابی شاعری
جد دی اکھ نال اکھ ملائی دُکھاں نے
سینے اندر اگ چا لائی دکھاں نے
رت نیں آوندی رت جیا ہُن پانی اے
انج دی میری اکھ روائی دکھاں نے
ہِجر ہنیرا ڈاڈھا دل نُوں راس آیا
سوہنی زخماں نال نبھائی دکھاں نے
علم نیں ہن ہجر وصل دی حالت دا
کیتی دل دی انج تباہی دکھاں نے
اپنی موت لئی ہتھ اٹھانے لازم سی
میرے دُکھ وچ ماں روائی دکھاں نے
ہن تے دردی خنجر وانگوں چُبھدا اے
کھوہ لئی آخر سب بینائی دکھاں نے
دکھ لِکھن نال لکھاں دے دکھ مٹنے نیں
میرے ہتھ وچ قلم پھڑائی دکھاں نے
دل کی دل دا چار چوفیرا ناں کیتا
ہن کیوں ساتھوں کنڈ ولائی دکھاں نے
تو کی سیفی تیری یاد وی دِسدی نہیں
کیتی دل دی انج صفائی دکھاں نے
قمر علی سیفی
No comments:
Post a Comment
Note: only a member of this blog may post a comment.