جدید پنجابی شاعری
میں آں گھبرو شکرگڑھ دا
میں آں گھبرو شکرگڑھ دا
میں دشمن کولوں نائیں ڈردا
خیری ساواں تیکر لڑدا
دم ہوندے میں نائیں ہردا
میں آں گھبرو شکرگڑھ دا
میری فطرت چ بے باکی اے
مینوں جچدی وردی خاکی اے
میں کرنی دیس دی راکھی اے
میں پٹی شہادت دی پڑھدا
میں آں گھبرو شکرگڑھ دا
اوکڑ ویلے اگے ہوناں واں
سنگ دیس دے ڈٹ کھلوناں واں
پہریداراں وانگ بھوناں واں
جان دہندا، نائیں میں ڈردا
میں آں گبھرو شکرگڑھ دا
میں اینج نئیں میدانے کَھلیا
ہڑھ اُجھ، راوی دا ے جھلیا
کنڈا بئیں، بسینتر دا مَلیا
تاں ای وَیری میتھوں ڈردا
میں آں گھبرو شکرگڑھ دا
جد عہد سِکھاں دا آیا سی
حقیقت ایتھے قلعہ چایا سی
جہدا ناں شکرگڑھ پایا سی
تھانر سی ایہ گنّے تے گٌڑ دا
میں آں گھبرو شکرگڑھ دا
کیہ میدان تے کیہ پہاڑ اے
میری جؤ دونواں وچکاراے
مینوں دونواں نال پیار اے
نسیم دونواں دی خیر منگدا
میں آں گھبرو شکرگڑھ دا
نسیم درمانوی
No comments:
Post a Comment
Note: only a member of this blog may post a comment.