جدید پنجابی شاعری
چڑھیا چیتر چار چفیرے
ماہی بھاجوں دسن ہنیرے
یاد پئی تیری ساڑے سینہ
راس نہ سانو چیت مہینہ
پھُلاں تے رُت سجری آئی
میری جان پھرے کملائی
خوشبو ہر تھاں لاے ڈیرے
چڑھیا چیتر چار چفیرے
آساں والے پھل کملا گے
ہر پنچھی دے ساتھی آ گے
ساڈے متھے رونا لِکھیا
گل لا کے دُکھ سونا لکھیا
ودھدے جاون دُکھ چنگیرے
چڑھیا چیتر چار چفیرے
چیتا تُوں سردار مہینہ
میرے نال کیوں رکھے کینہ
میرےمُکھ دی لالی کُھوہ کے
تانگاں دی ہریالی کھوہ کے
غیراں دے پینڈ لاے ڈیرے
چڑھیا چیتر چار چفیرے
بُلُبُل ڈاھڈا شور مچایا
کلیاں تے وی جوبن آیا
باغاں اندر شور وصل دے
اسی ترائیے روز ازل دے
دلبر میں ول مُکھ نہ پھیرے
چڑھیا چیتر چار چفیرے
نہ یاراں دی محفل کیتی
نہ ہی اپنا روپ سجایا
کپڑے لتے نوں اگ لانواں
ماہی جے نہ مکھ وکھایا
سنجے سیفی دل دے وھڑے
چڑھیا چیتر چار چفیرے
قمر علی سیفی
No comments:
Post a Comment
Note: only a member of this blog may post a comment.