جدید پنجابی شاعری
اسیں واسی دیس پنجاب دے ساڈا وِرثہ لوک وِراگ
اسیں بولی باہُو دی بولدے سانوں پیر فرید دی جاگ
اسیں سچے قول قرار دے ساڈی سِدھی صاف دلیل
ساڈا کہیں نئیں جھیڑا جھیڑیا اسیں اپنے آپ وکیل
اساں راتاں کٹیاں جاگ کے سانوں ہسیاں ہو گئے سال
ساڈے اج وی کچے کوٹھڑے ساڈا اج وی راہ تے مال
اساں روگ پرایا پالیا ساڈی کہیں ناں سمجھی نیک
سانوں اُس وی سدیا جانگلی اساں دِتی جِس نوں ٹیک
اجیں پی کے کَنگوں گھاٹیاں ساڈے سُتے پئے پردھان
اجیں چھوت چھپن کھیڈدے ساڈے گھبرُو شیر جوان
جداں جٹکی وسوں جاگسیں ساڈی جگ تے ہوسیں ٹھاٹھ
ساڈے وَیری کمبسن خوف توں انج بدلے لیسن راٹھ
جیویں مہر مراد دلیل دے لیا احمد خان دا وَیر
اِنج ویہڑیا جٹ انگریز نوں ناں چاون دِتا پَیر
اساں کالا پانی بھوگیا نئیں مُڑ وی منی ہار
اسیں پِرمی اپنے دیس دے سانوں رہتل نال اے پیار
اساں دیوا سِک دا بالیا اساں ویکھے سُکھ دے خاب
ساڈی عاقب جھوک رنگیلڑی شالا وسے دیس پنجاب
عاقب ستیانوی
No comments:
Post a Comment
Note: only a member of this blog may post a comment.