جدید پنجابی شاعری
پھلاں کلیاں وانگ نیں حرف مہکے
جدوں تیری خشبو تے غزل آکھی
نور پھٹیا لشک گئی روح میری
تیرے مکھ دی لو تے غزل آکھی
دھواں اٹھیا سادھواں لائے نعرے
بھخے مچ دے چو تے غزل آکھی
مست ناچ ہوئے رنداں جام پیتے
گیا ویلا کھلو تے غزل آکھی
عرش فرش تے وحدت دا جشن ہویا
اک ہوئے جاں دو تے غزل آکھی
کالی رات مکالڑی دور نسی
نھیرے پھٹ دی پو تے غزل آکھی
نظر ائیوں تے حسن دے گیت گائے
گئیوں مکھ لکو تے غزل آکھی
ہجر وصل وچھوڑے توں سوچ آگے
فیر سوچیا جو تے غزل آکھی
جدوں پتیاں اتے تریل پئے گئی
کلیاں مکھ لئے دھو تے غزل آکھی
مت مار لئی عشق نے زندگی دی
بیڑی چھڈی ڈبو تے غزل آکھی
حال پاہریا ریجھاں نے پائے ہاڑے
پئیاں سدھراں رو تے غزل آکھی
بھار عشقدا بھارا سی موہڈیاں تے
لیا بھار جد ڈھو تے غزل آکھی
ویر یاداں نے جدوں نڈھال کیتا
ہوش بھل گئی روح بے چین ہوئی
رہے رات بھر تتڑے نین روندے
گئے ہنجھو مکو تے غزل آکھی
تنویر ویر سپاہی
No comments:
Post a Comment
Note: only a member of this blog may post a comment.