جدید پنجابی شاعری
دم درود دعا دے پیسے
رب دی صفت ثنا دے پیسے
ملاں دی تنخواہ دے پیسے
راتیں توڑ مسیت دا تالا
لے گئے چور خُدا دے پیسے
دکھوں کرن اگاہ دے پیسے
ڈاکٹر لوے صلاح دے پیسے
چونڈی اک دوا دے پیسے
سونے مل دوا دی پیسے
راتیں توڑ مسیت دا تالا
لے گئے چور خُدا دے پیسے
چونڈی عدل دی بہہ کے لیندا
ہن تے مونہوں کہہ کے لیندا
قاضی جرم جفا دے پیسے
ظلماں دے ودھا دے پیسے
راتیں توڑ مسیت دا تالا
لے گئے چور خُدا دے پیسے
سائیڈ تے لا خاں گڈی بابا
آنے نہ ہن کڈھی بابا
کاغذ بھاویں ہوون پورے
لے کے رہنے چاہ دے پیسے
راتیں توڑ مسیت دا تالا
لے گئے چور خُدا دے پیسے
دور بلہاں توں ہاسے کر کے
ساتھ عمر دا پاسے کر کے
اوہنے وی اج منگ لئے میتھوں
اپنی شوق وفا دے پیسے
راتیں توڑ مسیت دا تالا
لے گئے چور خُدا دے پیسے
اسلم شوق
No comments:
Post a Comment
Note: only a member of this blog may post a comment.