ٹالھی والا گھر نہیں بھلیا

 جدید پنجابی شاعری

ٹالھی والا گھر

 کِکّر، ٹاہلی، بیری، نِمّاں

پِپّل، تُوت تے بوڑھ نئیں بُھلے

وٹاں بَنّے، نہر دا کنڈھا

اج تک پنڈ دے موڑ نئیں بھُلے

جمّوں  تے امرود نہیں بُھلے

ناں ای امب، لسُوڑے بُھلے

ناں تے بُھلڈ پنجیری بُھلی

ناں پِنیاں، ناں پُوڑے بُھلے

 

 بلد پنجالی ہل نہیں بُھلی

 واہناں، وانگھی، گڈ نہیں بُھلی 

گادھی، ٹِنڈ نسار نہیں بُھلی 

کھوہ کھاڈا تے اڈ نہیں بُھلی 

اُکھلی تے نہیں مُولھی بُھلی

 چِھکو، چھابی، چھج نہیں بُھلے

 سُگھڑ پن سگُچ نہیں بُھلے

 جاچ سُچج تے پچ نہیں بُھلے

‏جھانجھر والے پیر نہیں بُھلے

نتھلی والے نک نئیں بُھلے

رُوں توں کُولی بانہہ نئیں بُھلی

گندل ورگے لک نئیں بُھلے

اِک گنیاں دی روہ نئیں بُھلی

لسّیاں دے اوہ کَول نہیں بُھلے

سنگھنے دُدھ دی کِھیر نہیں بُھلی

گُڑ دے مِٹھے چول نہیں بُھلے

  سانجھ مروّت پیار نہیں بُھلے

 ورھیوں سِک وراگ نہیں بُھلے

 لسن پلا نہیں بوڑویں بُھلے 

مکی، مکھن، ساگ نہیں بُھلے

 رِجکا، موٹھ جوار نہیں بُھلی

 سرہوں، کنک کپاہ نہیں بھلی

 ہولاں تے نہیں سَتّو بُھلے 

لاچی لونگ دی چاہ نہیں بُھلی

مہندے تے نہیں وٹنے بُھلے

 جنج گھڑولی کھٹ نہیں بُھلے

 اک گھڑی جے گھول نہیں بُھلے

 میلے وی تے جھٹ نہیں بُھلے 

گُھگھی لالھی سہیڑ نہیں بُھلی 

شِکرے، لگڑ تے باج نہ بُھلے 

تاڑی تے نہیں ہاکر بُھلی 

رہیکلیاں دی واج نہ بُھلے 

کاپے تے نہیں ڈھانگے بُھلے

تیر، کمان، غُلیل نہیں بُھلی

 ٹیشن تے نہیں ٹانگے بُھلے

 آؤندی جاندی ریل نہیں بُھلی

 نِنگلاں، لاٹُو ڈور نہیں بُھلی 

باگھڑ تے اخروٹ نہیں بُھلے

 یَسّو، پنجُو، ہار نہیں بُھلے

  اج تک کَلّیاں جوٹ نہیں بُھلے

 چِبھڑ تے نہ پیلاں بھُلیاں

 نہ ای یار بھپولے بُھلے

 نہ ای گچک مرُونڈے بُھلے 

نہ ٹانگر تے گولے بُھلے

 واواں ورگی ٹور نہیں بُھلی

 سپّاں ورگی گُت نہیں بُھلی

 کِھڑ کِھڑ ہسدے دِن نہیں بُھلے

 گلاں کردی رُت نہیں بُھلی

 گلیاں دے رنگ رُوپ نہیں بُھلے

 رب جہے یار دا در نہیں بُھلیا

 وانساں آلی گُٹھ نہیں بُھلی

 ٹالھی والا گھر نہیں بُھلیا

 ارشاد سندھو