گھن غماں دا لا گیا دل نوں

 جدید پنجابی شاعری

گُھن غماں دا لا گیا دل نوں

روگ ہجر دا کھا گیا دل نوں

رہواں ویہندیاں چِٹے آ گئے

جھوٹھے لارے لا گیا دل نوں

دل دے ویہڑے دل نہیں وڑدا

ایسے ہتھ وکھا گیا دل نوں

چٹے دن نے راتاں وانگوں

انج ہنیرے پا گیا دل نوں

اُس دے باجوں کُجھ نہیں دِسدا

ایسا دل نال لا گیا دل نوں

یاد دے بھامبھڑ ساڑیا سینہ

کیسی تیلی لا گیا دل نوں

سب دا رون دِکھاوہ لگے

ایسا روپ وکھا دل نوں

رہواں ویہندا چِٹے آ گے

جھوٹھے لارے لا گیا دل نوں

اس دی یاد بنا نہ دھڑکے

ایسا ویری بھاہ گیا دل نوں

دل نال کھیڈیا ویری دل دا

دلبر مار مکا گیا دل نوں

سیفی نُکر وچ نہ نُکر لبھے

کیہڑی نُکرے لا گیا دل نوں

قمر علی سیفی