رنگ وطن: عبیداللہ توحیدی

Showing posts with label عبیداللہ توحیدی. Show all posts

Wednesday, 1 April 2026

جدید پنجابی شاعری

درد حیاتی دُھپ دے سائے ہائے نی مائے

سر تے بھار ہجر دے چائے ہائے نی مائے

بے گھر بندہ سرد ہوا بے حسی دی

خون رگاں وچ جمدا جائے ہائے نی مائے

کول ہووے اوہدے اگے ہتھ وی جوڑ لیئے

دُور گئے نُوں کون منائے ہائے نی مائے

جدید پنجابی شاعری

اپنے پتر ثناءاللہ توحیدی دی یاد وچ

میرے دل وچ وسن والیا مینوں کر گیوں ریت سراب

مینوں دے کے رج جگراتڑے لے ٹُریوں اکھیوں خواب

میرا پل پل سُولی چاہڑ کے مینوں دے گیوں ہجریں پھاہ

اے کاش کدے تُوں ویخدوں میرا ہویا حال تباہ

میں روناں میریا بچیا! ہر ساہ تے بھر بھر رُگ

میں جگ دے وچ آباد ہاں میرے اندر سارا لُگ

جدید پنجابی شاعری

کیہ دساں کس حال اِچ لنگی کُجھ نہ پُچھ

لیر جیویں وِچ کِکراں ٹنگی کجھ نہ پچھ

سوچاں دے میرے اندر مقتل بن گئے نیں

اینج دی ہووے خانہ جنگی کجھ نہ پچھ

ویلے مینہ پتھراں دا جد وسایا تے

کیویں نسے ساتھی سنگی کجھ نہ پچھ

جدید پنجابی شاعری

اسیں قوم چھیتّر سالڑی اسیں جگ دے وچ نلام

اساں دِتیاں لکھ قربانیاں اسیں فیر وی رہے غلام

ساڈے راکھے قاتل بن گئے اسیں جیوندے لتھ گئے گور

ساڈے لُوں لُوں وچ فریاد ہے اسیں چُپ چپیتے شور

ایتھے بے انصاف عدالتاں ایتھے لیرو لیر قنون

ایتھے قاضی ڈنڈیاں ماردے ایتھے عدلیں ہوندا خون