رنگ وطن: اقبال شیدا

Showing posts with label اقبال شیدا. Show all posts

Saturday, 7 March 2026

جدید پنجابی شاعری

ذرے ذرے دے وِچکار

ذات تیری توں اے لشکار

تیریاں توہیوں جانڑدا ایں

جانے کون تیرے اسرار

سبھ دی کریں حفاظت تُوں

سبھ دا تُوں ایں پالنہار

جدید پنجابی شاعری

آن دا وعدہ تے کیتا پر نہ آیا جان کے

جان دا ہاں اس نے میرا دل دکھایا جان کے

نظر بھر کے ویکھدا تے بھاگ میرے جاگدے

پھیر نظراں سُولی غم دی اُس چڑھایا جان کے

جیہڑا کہندا سی پیارا اوہنوں ہاں میں جان توں

پاسہ وٹ کے لنگھ گیا مینوں پرایا جان کے

جدید پنجابی شاعری

ایہ کالیاں زلفاں نیں یاں شام خدا جانے

مستانیاں اکھاں نیں یاں جام خدا جانے

چلے تے دلاں اندر ہلچل جہی مچا دیوے

کیہ حشر اُٹھاوے گی ہر گام خدا جانے

تصویر حسن دی ایہ رب آپ بنائی اے

ہے کِس دیاں لیکھاں دا انعام خدا جانے