توحید
بے وس ایہہ گل سوچنڑ اُتّے دُنیا دا ہر بندہ
کوئی تے ہے چلاونڑ والا اِس دُنیا دا دھندہ
چار چومُکھّی پانڑی اُتّے کِس نے فرش ٹِکایا
سینساں دسّنڑ مِٹّی نُوں چا گوشت وانگ بنایا
تیلا، مائیں، ککّی کیڑی، ہاتھی، شیر، بھِگیاڑ
ہور ہزاراں جُوناں نالے مِٹّی، ریت، پہاڑ
رُتّاں، ویلے، بدّل، واواں، دِن، دِیہاڑے، راتاں
کِہڑی کِہڑی گِنڑ کے دسّاں ون و ون سوغاتاں
میوے، بُوٹے، پُھل ہزاراں رنگ و رنگ کھِڑائے
وکھّو وکھ تاثیر ایہناں دِی، وکھّو وکھ بنڑائے
سینساں جِتنا زور لگاونڑ بن نئیں سکدی مکھّی
ہِک قطرے وِچ پیدائشاں دِی قُدرت کِس نے رکھّی
دُنیا دِی ہر شئے دِی مِٹّی کِس بُنیاد بنائی
ہر بندے نُوں منڑاں پؤسی ہِکّو ذات اِلٰہی
جے ہِکّی توں چوکھے ہوندے بھانویں ہوندے دو
فیر سیاستداناں والے لگّے ریہندے شو
آپو اپنڑی گل تے اڑدے آپو اپنڑی کردے
فیر نہ چن تے سُورج ایتھے ویلے دے سِر چڑھدے
ہر بندے نُوں منڑاں پیندائے واحِد مالِک اللہ
ایدوں ودھ کے سوچنڑ والے عقلاں دے سِر کھلّا
ہِک ہِکلّے کِتھّے کِتھّے جھوکاں نئیں وسائیاں
گُجھیاں بھیداں اُتّوں پردہ چا نئیں حیدرؔ سائیاں
سائیں غلام حیدر
