ماں میں تیری چھاں دے اتوں باغ بہاراں وار دیاں

ماں

دھرتی دے سب پُھلاں دے نال تیرا روپ سنوار دیاں

ماں میں تیری چھاں دے اُتوں باغ بہاراں وار دیاں

نِکے ہوندیاں موڈھے لا کے راتیں پِھردیاں رہنا

جگراتے دی سُولی چڑھ کے ‘سوں جا سوں جا’ کہنا

لکھاں عُمراں تیری رات دے جگراتے توں وار دیاں

نِکی نِکی گَل توں رُسے پُت مناؤندیاں رہنا

روٹی لے پچھے پھرنا ‘کھا لَے کھا لَے’ کہنا

تیریاں ایہناں منتاں اُتوں جگ دی عزت وار دیاں

بُوہے وِچ کھلو کے ساہڈیاں راہواں تکدیاں رہنا

تھوڑی جئی وی دیر ہووے تے ہتھ کلیجے پینا

تیرے سُچے پیار توں سارے پیار خزانے وار دیاں

نال دوپٹے پُت دے منہ دا مُڑھکا پونجدے رہنا

ٹھنڈے دُدھ دا چھنا لے کے ‘پی لے پی لے’ کہنا

تیری خدمت گاری اُتوں سُلطاناں نوں وار دیاں

تیرے پیار دا سُورج لے کے روز حیاتی آوے

اپنے آپ نوں ساڑ کے لَکھاں خوشیاں ونڈدا جاوے

میں قانونِ قدرت تیری فطرت اُتوں وار دیاں

شِکر دوپہرے گلی وِچ کُلفی گولے والیاں آنا

ماں نے کنی لیڑے دی چوں پیسا کڈھ پھڑانا

تیری ایس سخاوت اُتوں حاتم طائی وار دیاں

سجر سویرے اُٹھ کے ماں نے دُدھ مدانی پانا

اوہدی سوہنی گر گر دے نال ادھا پنڈ جگانا

یوگٹ والیاں فرماں ماں دی چاٹی اُتوں وار دیاں

باسی روٹی اُتے مکھن تازہ تازہ ہونا

پیڑی اُتے بہہ کے ماں نے ہتھاں نال کھوانا

ماں دے ہتھ دی اک بُرقی توں ہوٹل شوٹل وار دیاں

بچپن دے وِچ پُتراں جے کدے الاہمے آئے

میرے پُتر ایہو جئے نئیں لوکاں نوں سمجھائے

تیری ایس وکالت اُتوں کورٹاں باراں وار دیاں

کچی پکی دے وِچ ماں نے نال سکولے جانا

میرے پُت نوں کدے نہ ماریں ماسٹر نوں سمجھانا

تیری ایس سفارش اُتوں پِنڈ پنچائتاں وار دیاں

سخر دوپہرے مُنڈیاں رَل کے نہرے نہاون جانا

تتڑی ماں نے دُھپے سَڑ کے پہرا دیندیاں رہنا

ماں دی ایس نگرانی اُتوں فوجاں فوجاں وار دیاں

عیداں تے شبراتاں اُتے ماواں گھر سجانے

اپنے پیار دا شہد گھول کے کھانے کئی بنانے

انٹر کونٹیننٹل ایہناں کھانیاں اُتوں وار دیاں

عیدی دیون واسطے کڈھنا پیسیاں والا مگھا

اَج دے لَکھاں ڈالر نالوں ماں دا پیسا چنگا

ماں دے مگھے پیسیاں دے توں بینکاں شینکاں وار دیاں

اک دُوجے دے قلم دواتاں بچیاں جد لُکانے

گودی وِچ بٹھا کے ماں نے پیار دے نال کڈھانے

ماں دی اِس تفتیش دے اُتوں پولساں تھانے وار دیاں

ساڈیاں خیراں منگن دے لئی سجدے وِچ ڈِگ جانا

لِکھاں ہنجُو دے کے ماں نے رَب نوں روز منانا

تیرے اِک اِک سجدے اُتوں لکھاں سجدے وار دیاں

دیساں دے وِچ بیٹھی ماں نے جد وی حُکم چلانا

ہوائی جہاز د ا ٹکٹ کٹا کے پُتر اُڈدے جانا

ایسی حُکم دی رانی اُتوں یو این او نوں وار دیاں

بیری دے بُوٹے دے وانگوں ماں دی زندگی ساری

پتھر بدلے پَھل دیندی اے ایہدی رِیت نیاری

ایسی صابر ماں دے اُتوں سارے صابر وار دیاں

روواں تے کُرلاواں نالے سو واری ہتھ جوڑاں

مینُوں میرا بچپن دے دئیو لے لؤ لکھ کروڑاں

ماں دی گود دے پَل پَل اُتوں جگ دی شاہی وار دیاں

سب پُتراں دی میرے ربا عرضی تیرے اَگے

ماواں نوں کوئی دُکھ نہ پہنچے تَتی واء نہ لگے

بشارتؔ ماں دے سُکھاں اُتوں لَکھاں جیون وار دیاں

بشارت احمد بشارت