سب کُجھ کیتا اے، صبر نیں کِیتا
سب کُجھ کِیتا اے، صبر نیں کِیتا
کیویں آکھاں، سور نیں کھادا
جام نیں پیتا
سب کُجھ کِیتا اے، صبر نیں کِیتا
قبراں دے وِچ ماریا اے فیتا
مستی دے وِچ گلما پاڑیا اے
ننگ نیں سِیتا
اپنی مسجد آپ بنائی
اپنا کلمہ آپ پڑھیتا
کِیویں آکھاں کُجھ نیں کِیتا
سب کُجھ کِیتا اے، صبر نیں کِیتا
الف توں لے کے ی تک اَت مچائی اے
جیہڑی رات شکار نیں کیتا
اکھ نیں لائی
جنگلاں دے وِچ کُتیاں وانگوں بَجھیا اے چِیتا
کِیویں آکھاں کُجھ نیں کِیتا
سب کُجھ کِیتا اے، صبر نیں کِیتا
تھک ٹُٹ کے ہُن اپنیں پیرِیں پے گئے آن
معنیاں جوگے رہ گئے آں
ہَتھ وِچ کجھ نیں، بوہجے خالی
اَکھ سوالی ہو گئی اے
ساڈیاں اپنیاں عملاں پاروں
ساڈی صورت
ویکھن والی ہو گئی اے
محمد سلیم طاہر
No comments:
Post a Comment
Note: only a member of this blog may post a comment.