اینویں نہ لا بیٹھیں یار

 سوچ سمجھ کے چُکیں بھار

اینویں نہ لا بیٹھیں یار

پہلے کر لے سوچ وچار

ایتھے یوسفؑ ورگے بَردے

مَردے جِیندے، جِیندے مَردے

یار دی خاطر کی کُجھ کردے

وِکناں پیندا ایس بزار

اینویں نہ لا بیٹھیں یار

پہلے کر لے سوچ وچار

ایتھے دولت دا نئیں کَم

ایتھے اگلے منگدے چَم

ایتھے کوئی نہ کہندا ہم

ایتھے تُم دی اے سرکار 

اینویں نہ لا بیٹھیں یار

پہلے کر لے سوچ وچار

ایتھے سَسّی تَھل وِچ سَڑدی

سوہنی کَچّے تے پئی تَردی

کوئی نہ ایتھے مانگاں بَھردی

ہیر سلیٹی کَھجّل خوار

اینویں نہ لا بیٹھیں یار

پہلے کر لے سوچ وچار

ایتھے وَنجلی کَم نہ آندی

رو رو لنگھ حیاتی جاندی

کَلّی کُونج پئی کُرلاندی

سبھ پاون ہنجواں دے ہار

اینویں نہ لا بیٹھیں یار

پہلے کر لے سوچ وچار

ایتھے غم دِیاں چَڑھیاں کانگاں

ایتھے ہوکے، ہنجُو، تاہنگاں

اَدھی راتیں مِلدیاں بانگاں

ہمّت ہے تے نفل گزار

اینویں نہ لا بیٹھیں یار

پہلے کر لے سوچ وچار

ایتھے سارے شیشے ٹُٹدے

دُنیا والے کِرچاں لُٹدے

موت توں پہلاں ساہ پئے گُھٹدے

سوچ سمجھ کے چُکیں بھار

اینویں نہ لا بیٹھیں یار

پہلے کر لے سوچ وچار

گَل وِچ کَفنی، کَن وِچ والے

ایتھے پَیراں ہیٹھ دوشالے

ایتھے کَھٹیاں کوئی نہ گھالے

پتّاں لِہندیاں بھرّے بزار

اینویں نہ لا بیٹھیں یار

پہلے کر لے سوچ وچار

ایتھے کَھل لُہاندے سارے

سُولی ٹنگے جان وچارے

ایتھے وَگدے خُون دے دھارے

پہلاں اپنے آپ نُوں مار

اینویں نہ لا بیٹھیں یار

پہلے کر لے سوچ وچار

نہ کوئی دُور نہ ایتھے نَیڑے

وِچے بیڑے، وِچے جھیڑے

وِچے رانجھے، وِچے کھیڑے

اپنے اندر جھاتی مار

اینویں نہ لا بیٹھیں یار

پہلے کر لے سوچ وچار

ایتھے واصفؔ! شاہ نہ کوئی

پَل دی پَل وساہ نہ کوئی

ایتھے دَسّے راہ نہ کوئی

اپنے آپ نُوں واجاں مار

اینویں نہ لا بیٹھیں یار

پہلے کر لے سوچ وچار

واصف علی واصف