چھت دیاں کَڑیاں نچدیاں نیں منجی دے پاوے نچدے نیں
اَدھی راتیں ویہڑے دے وِچ، وہم بڈاوے نچدے نیں
لو نِمھی تے سازاں دی دُھن اچی ہوندی جاندی اے
نَچے کوئی کلاویاں اندر، باہر کلاوے نچدے نیں
اپنی لاش تے کھڑیاں ہو کے میں وی واہ واہ کیتی اے
لوکاں ایویں چک دِتا اے نمروداں، شداداں نُوں
اَج وی بُھکن بھانیاں اگے، ان ورتاوے نچدے نیں
چُپ چپیتے لوکاں دے نال ویکھیں متھہ لا نہ بہئیں
اپروں ٹھنڈیاں کلبوتاں دے اندر، لاوے نچدے نیں
چار دیہاڑے دی ایہہ جندڑی طاہرؔ کھیڈ تماشہ اے
ویلے دی بارش دے وِچ مٹی دے باوے نچدے نیں
محمد سلیم طاہر
No comments:
Post a Comment
Note: only a member of this blog may post a comment.