گجھیاں سٹاں جر کے روئے
سفنے وچ ڈر ڈر کے روئے
بانہواں کھلیاں کر کر کوکے
گوڈیاں وچ سر دھر کے روئے
تاڑی مار کے سجن ہسے
ویری اکھاں بھر کے روئے
اندروں کنڈی مار کے تڑفے
اندرو اندری مر کے روئے
ہاڑے، تھل دے سینے ساڑے
پربت پربت ٹھر کے روئے
بدل گجے، روح نئیں رجے
وچ چنھاواں تر کے روئے
حال دہائی، جگت ہنسائی
جت کے ہسے، ہر کے روئے
ساہنوں عشق روایا دوشی
خورے اوہ کیہ کر کے روئے
رانا سعید دوشی
No comments:
Post a Comment
Note: only a member of this blog may post a comment.