اک کڑی دا وین
انگلا منگلا
پیئو میرا کنگلا
ماں میری بڈھری
ویر میرا چرسی
گھر وچ بھکھ اے
گھر وی کرائے دا
اتوں ہمسائے دا
گھڑی مڑی تکے مینوں
راہ وچ ڈکے مینوں
سوچاں مینوں تنبیا
لوں لوں کنبیا
چٹے ہوئے وال سارے
لنگھ گئے سال سارے
ہسنے تے کھیڈنے دے
گت نوں لویٹنے دے
گدا وی تے پایا ناہیں
من پرچایا ناہیں
گڈیاں پٹولے سارے
رہن اکھوں اوہلے سارے
پیلے میرے ہتھ وی نہیں
نک میرے نتھ وی نہیں
متھے میرے ٹکا وی نہیں
باپو کول سکا وی نہیں
کتھوں او بناوے داج
کنوں کنوں دیوے واج
سن میرے مالکا
کل دیا خالقا
کوجھی آں یا چنگی آں
تیرے رنگ رنگی آں
دکھاں دی ستائی آں
تیرے در آئی آں
دکھڑے سنان میں
کہدی آں ننان میں
کہدی بھرجائی آں
میں وی حوا جائی آں
میں وی حوا جائی آں
حکیم احمد نعیم ارشد
