ہنجواں وچ ہر منظر تَردا ویکھ ریاں
اکھیاں راہیں جیون ہڑ دا ویکھ ریاں
روز سویرے لاشہ لے ٹُر پیندا واں
ہر راتیں اک سُفنا مردا ویکھ ریاں
جنگل دے وچ دور کتے اک بستی سی
اوس بستی وچ دیوا بلدا ویکھ ریاں
پھلاں رانی دے جُثے وچ سویاں سن
روز شہزادہ اک میں مردا ویکھ ریاں
دریاواں وچ پانی پُٹھا وگدا اے
لیندے ول دی سورج چڑھدا ویکھ ریاں
عمر گزاری جاذبؔ وچ پردیساں دے
ورھیاں پِچھوں بُوہا گھر دا ویکھ ریاں
انصر جاذب
