بخت نہ وکدے مل وے

بخت نہ وِکدے مُل وے

رنگا رنگ نیں کپاہ دے پُھل وے

کِتے بخت نہ وِکدے مُل وے 

لیندے نہ خرید، پر جیویں ہانیاں
کریئے تے کریئے، کی وے ہانیاں
کرن نہ دیندے اُچی سی وے ہانیاں
ہنجھو چندرے نے پیندے ڈلھ وے
کِتے بخت نہ وکدے مل وے 

ہتھ اپنے چ اپنی ڈور نہیں

جیہدے ہتھ وچ، اس تے زور نہیں

لکھی دُھر دی تے ہوندی ہور نہیں

لکھ ہفئے پئے گُھل گُھل وے
کِتے بخت نہ وکدے مل وے 

مٹی ڈھوئی کسے چک پھیرے

کسے وگ سیالاں دے چھیڑے

جدوں بخت نہ ہون چنگیرے

راہ نیلیاں جاندیاں بُھل وے

کِتے بخت نہ وکدے مل وے 

شریف کنجاہی